جیمز اینڈرسن ٹیسٹ کرکٹ میں تاریخ رقم کرنے کے قریب
سابق آسٹریلوی فاسٹ باﺅلر گلین میگراتھ نے کہا ہے کہ جب انگلش فاسٹ باﺅلر جیمز اینڈرسن ٹیسٹ کرکٹ میں میری زیادہ وکٹوں کا ریکارڈ توڑ دیں گے اس کے بعد کسی دوسرے فاسٹ باﺅلر کیلئے اینڈرسن کے ریکارڈ تک پہنچنا بہت مشکل ہو گا۔ میگراتھ کو ٹیسٹ کرکٹ کی تاریخ میں بطور فاسٹ باﺅلر زیادہ وکٹیں لینے کا اعزاز حاصل ہے، انہوں نے 563 وکٹیں لے رکھی ہیں لیکن اب ان کا ریکارڈ جیمز اینڈرسن کے نشانے پر آ گیا ہے اور انہیں سنگ میل عبور کرنے کیلئے 7 وکٹوں کی ضرورت ہے، توقع ہے کہ وہ بھارت کے خلاف جاری چوتھے ٹیسٹ میں میگراتھ کو پیچھے چھوڑ دیں گے۔ میگراتھ نے اپنے بیان میں کہا ٹیسٹ کرکٹ میں زیادہ وکٹیں لینے پر مجھے فخر ہے لیکن جب اینڈرسن میرے ریکارڈ کو عبور کریں گے یہ بھی میرے لئے باعث فخر لمحہ ہو گا، میں سمجھتا ہوں کہ اینڈرسن اس اعزاز کے حقدار بھی ہیں۔ انہوں نے کہا کہ اینڈرسن دونوں طریقوں سے گیند کو سوئنگ کرنے کی صلاحیت رکھتے ہیں، میرے خیال میں اس کے علاوہ صرف وسیم اکرم کو اس کی مہارت تھی، ہر باﺅلر اس قابل نہیں ہوتا اسلئے میں یقین کے ساتھ کہہ سکتا ہوں کہ جب اینڈرسن مجھے پیچھے چھوڑ دیں گے تو اس کے بعد کسی دوسرے فاسٹ باﺅلر کیلئے ان کے ریکارڈ کو توڑنا مشکل ہو گا۔