اقوام متحدہ کشمیریوں پربھارتی مظالم کے متعلق تحقیقاتی کمیشن بنائے۔ شاہ محمود قریشی
وزیر خارجہ شاہ محمود قریشی نے کہا کہ اقوام متحدہ کشمیریوں پربھارتی مظالم کے متعلق تحقیقاتی کمیشن بنائے جبکہ او آئی سی رابطہ گروپ کشمیرکی مسلسل بگڑتی سنگین صورتحال کا جائزہ لے۔ اوآئی سی اجلاس میں کشمیروفلسطین کی صورتحال پراظہارخیال کرتے ہوئے وزیرخارجہ محمود قریشی نیکہا کہ بھارت مقبوضہ کشمیرسمیت ہرجگہ اقلیتوں پرمظالم کررہا ہے، کشمیریوں کا حق خودارادیت بزوربازو دبانے کی کوشش کی جارہی ہے، مقبوضہ جموں وکشمیرمیں انسانی حقوق کی صورتحال انتہائی سنگین ہے اورسینئرکشمیری قیادت مسلسل قید اورنظربندیوں کا نشانہ بن رہی ہے۔شاہ محمود قریشی نے کہا کہ قابض بھارتی فوج کے جودل میں آئے کرنے میں آزاد ہے، مقبوضہ کشمیرکی صورتحال مسلسل ابتری کی طرف گامزن ہے اس لیے اقوام متحدہ کشمیریوں پربھارتی مظالم کے متعلق تحقیقاتی کمیشن بنائے جبکہ او آئی سی رابطہ گروپ کشمیرکی مسلسل بگڑتی سنگین صورتحال کا جائزہ لے۔شاہ محمود نے کہا کہ پاکستان مسئلہ کشمیرکا پرامن حل چاہتا ہے، شاہ محمود قریشی نے کہا کہ شرکاء کی بھرپور حمایت مظلوموں کے لئے باعث راحت اورتقویت ہے، پلوامہ واقعے کے بعد انتہا پسند ہندووں کی جانب سے کشمیریوں کو نشانہ بنانے کے واقعات میں اضافہ ہوگیا ہے جبکہ 2018 بھارتی ریاستی دہشت گردی کے لحاظ سے بدترین ثابت ہوا۔شاہ محمود قریشی نے کہا کہ دواین جی اوزنے اپنی رپورٹ میں ریاستی دہشت گردی کی بھیانک تفصیلات بیان کیں، جموں وکشمیر اقوام متحدہ کے ایجنڈے پردیرینہ ترین تصفیہ طلب مسئلہ ہے، اوآئی سی رابطہ گروپ دوٹوک اندازمیں حق خودارادیت کی حمایت کا اعادہ کرے جبکہ گروپ حقائق معلوم کرنے والے مشن کو بھجوانے کا مطالبہ دہرائے۔فلسطینی مسلسل اسرائیلی ظلم وجبرکا شکاربن رہے ہیں، پاکستان فلسطین کی صورتحال پرخاموش نہیں رہے گا، فلسطینیوں پرمظالم کی پرزورمذمت کرتے ہیں، پاکستان فلسطینیوں کے ساتھ اورآزاد فلسطینی ریاست چاہتا ہے جبکہ دنیا فلسطین کو1967سے قبل کی سرحد کے ساتھ تسلیم کرے۔ وزیرخارجہ مخدوم شاہ محمود قریشی نے جموں وکشمیر پر رابطہ گروپ کا اہم اجلاس بلانے پرسیکریٹری جنرل اوآئی سی کا شکریہ بھی ادا کیا۔
