منصوبوں کی آڑ میں کرپشن کرنے والے ملک و قوم کے مجرم ہیں۔ وزیر اعلیٰ پنجاب
وزیر اعلیٰ پنجاب سردار عثمان بزدار نے کہاہے کہ قومی وسائل پر ڈاکہ ڈالنے کا دور کبھی واپس نہیں آئے گا،منصوبوں کی آڑ میں کرپشن کرنے والے ملک و قوم کے مجرم ہیں،تنقید کی پرواہ کئے بغیر عوامی خدمت کے سفر کو جاری رکھیں گے،عوامی خدمت کے نئے ریکارڈ قائم کرکے عوام کے مینڈیٹ کی لاج رکھیں گے جبکہ وزیر اعظم کی معاون خصوصی برائے اطلاعات ڈاکٹر فردوس عاشق اعوان نے کہا کہ اپوزیشن جماعتوں کو پاکستان کے عوام کے مسائل سے کوئی سروکار نہیں،یہ جماعتیں عوامی مسائل میں اضافے کی ذمہ دار ہیں۔وزیر اعلیٰ پنجاب سردار عثمان بزدار سے وزیر اعظم کی معاون خصوصی برائے اطلاعات ڈاکٹر فردوس عاشق اعوان نے ملاقات کی۔اس موقع پر گفتگو کرتے ہوئے وزیر اعلیٰ پنجاب سردار عثمان بزدار نے کہا کہ قومی وسائل پر ڈاکہ ڈالنے کا دور کبھی واپس نہیں آئے گا،منصوبوں کی آڑ میں کرپشن کرنے والے ملک و قوم کے مجرم ہیں،سابق حکمرانوں نے نمود و نمائش کے منصوبوں میں قومی وسائل برباد کئے، قومی وسائل کی بندربانٹ کرکے ذاتی تجوریاں بھری گئیں،لوٹ مار کرنے والوں کو اپنے کئے کا حساب دینا ہوگا،کرپٹ عناصر کے بلاامتیاز احتساب سے ہی پاکستان آگے بڑھے گا،وزیراعظم عمران خان کی قیادت میں تحریک انصاف کی حکومت قومی وسائل کو عوام کی امانت سمجھتی ہے،ہماری قیادت نے قومی وسائل اپنی ذات پر خرچ کرنے کی غلط روایت کو ختم کیا ہے،اب عوام کا پیسہ فلاح عامہ پر ہی صرف ہو رہا ہے،تنقید کی پرواہ کئے بغیر عوامی خدمت کے سفر کو جاری رکھیں گے،عوامی خدمت کے نئے ریکارڈ قائم کرکے عوام کے مینڈیٹ کی لاج رکھیں گے۔ملاقات کے دوران گفتگو کرتے ہوئے وزیر اعظم کی معاون خصوصی برائے اطلاعات ڈاکٹر فردوس عاشق اعوان نے کہا کہ وزیر اعلیٰ عثمان بزدار پنجاب میں عوام کی بے لوث خدمت کر رہے ہیں،اپوزیشن کا بیانیہ کرپشن پر پردہ ڈالنے کا بیانیہ ہے، اپوزیشن جماعتوں کو پاکستان کے عوام کے مسائل سے کوئی سروکار نہیں،یہ جماعتیں عوامی مسائل میں اضافے کی ذمہ دار ہیں،عام انتخابات میں مسترد عناصر کی منفی سیاست دم توڑ چکی ہے،حکومت عوام کے مسائل حل کرنے کیلئے ہر ممکن اقدام اٹھا رہی ہے۔
