جیکب آباد میں قیامت خیز گرمی، درجہ حرارت 49 سینٹی گریڈ تک پہنچ گیا،گرم ہواؤں اور شدیدگرمی سے متعدد افراد بے ہوش ،شدید گرمی کی وجہ سے شہری گھروں میں محصور ہوکر رہ گئے، بجلی کی غیر اعلانیہ لوڈشیڈنگ نے شہریوں کا جینا محال کردیا، ایکسپریس فیڈر پر 11 گھنٹوں کا طویل بریک ڈاؤن، عوام بلبلا اٹھے۔ تفصیلات کے مطابق جیکب آباد میں جمعرات کے روز گرمی کی شدت میں بے اضافہ رہا، درجہ حرارت 49 سینٹی گریڈ ریکارڈ کیا گیا،گرمی کی شدت میں اضافے اور گرم ہوائیں چلنے کی وجہ سے شہری گھروں تک محدود ہوکر رہ گئے ہیں جبکہ دوپہر کے وقت سڑکیں اور مارکیٹیں مکمل سنسان رہی، جیکب آباد میں شدید گرمی اور گرم ہوائیں چلنے کی وجہ سے متعدد افراد کے بے ہوش ہونے کی بھی اطلاعات موصول ہوئی ہیں، جیکب آباد میں قیامت خیز گرمی کی وجہ سے روزے داروں نے ٹیوپ ویل اور تالابوں کا رخ کیا تاکہ وہ شدید گرمی کی شدت سے بچ سکیں، ایک طرف قیامت خیز گرمی تو دوسری جانب بجلی کی لوڈشیڈنگ نے شہریوں کا جینا محال کردیا ہے، جیکب آباد کے مختلف فیڈرز پر 10 سے 12 گھنٹوں کی لوڈشیڈنگ کی جارہی ہے جبکہ جیکب آباد کے ایکسپریس فیڈر پربدھ کی رات 11 بجے سے جمعرات کی صبح 10 بجے تک مسلسل بجلی بند رہی جبکہ اس کے بعد لوڈشیڈنگ کے مقررہ اوقات میں بھی بجلی بند رہی،ایکسپریس فیڈر پر 11 گھنٹوں کا طویل بریک ڈاؤن کیا گیا جس کی وجہ سے عوام کوشدید مشکلات کا سامنا کرنا پڑا،ایکسپریس فیڈر پر 11 گھنٹوں کے بریک ڈاؤن کی وجہ سے سول اسپتال میں مریض بلبلا اٹھے اور سول اسپتال میں داخل مریضوں کو شدید تکلیف کا سامنا کرنا پڑا، سیپکو حکام کے مطابق نمائش گراؤنڈ کے قریب گیارہ ہزار وولٹیج کی تار گرنے کے باعث ایکسپریس فیڈر کی بجلی بند رہی مرمتی کام مکمل کرنے کے بعد بجلی کو بحال کردیا گیا، شہریوں نے مطالبہ کیا ہے کہ جیکب آباد ایشیاء کا گرم ترین علاقہ ہے جہاں بجلی کی لوڈشیڈنگ ختم کی جائے اورعوام کو قیامت خیز گرمی میں بجلی کی فراہمی کو یقینی بنایا جائے۔