یہ اعلان ایکس کے مالک ایلون مسک کی جانب سے کیا گیا، ایلون مسک نے ایکس پر ایک پوسٹ میں بتایا کہ آڈیو اور ویڈیو کالز کا فیچر جلد صارفین کو دستیاب ہوگا، یہ فیچر اینڈرائیڈ، آئی او ایس، میک اور ونڈوز کمپیوٹر پر کام کرے گا۔ ان کا کہنا تھا کہ آڈیو اور ویڈیو کالز کرنے کیلئے کسی فون نمبر کی ضرورت نہیں ہوگی۔ ایلون مسک کے مطابق ایکس ایک گلوبل ایڈریس بک ہے اور اسی لئے کالز کیلئے فون نمبر کی ضرورت نہیں۔ خیال رہے کہ یہ وہ فیچر ہے جس کا حوالہ حالیہ مہینوں میں کئی بار کمپنی کی جانب سے دیا گیا، سب سے پہلے مئی 2023 میں ایلون مسک نے اس فیچر کو متعارف کرانے کی بات کی تھی۔ اس موقع پر ان کا کہنا تھا کہ اس فیچر کو متعارف کرانے کے بعد ہر صارف کسی بھی فرد سے دنیا بھر میں فون نمبر کے بغیر آڈیو یا ویڈیو کال پر بات کر سکے گا۔ بعد ازاں جولائی 2023 میں ٹوئٹر کی ڈیزائنر اینڈریا کانوے نے اس فیچر کی ایک جھلک پیش کی تھی، انہوں نے ایک ایکس پوسٹ میں سکرین شاٹ شیئر کیا تھا جس میں ویڈیو چیٹ کے فیچر کو استعمال کرتے ہوئے دکھایا گیا تھا۔ بعد ازاں اگست کے شروع میں ایکس کی چیف ایگزیکٹو لینڈا یاکارینو نے سوشل میڈیا پلیٹ فارم میں بہت جلد ویڈیو کالز کے فیچر کو متعارف کرانے کا اعلان کیا۔ ایک ٹی وی انٹرویو کے دوران ایکس کی چیف ایگزیکٹو نے کہا کہ سوشل میڈیا پلیٹ فارم میں ویڈیو کالز کے فیچر کا اضافہ کیا جا رہا ہے، یہ نئی تبدیلیاں ایلون مسک کی جانب سے ایکس کو سپر ایپ بنانے کے اقدامات کا حصہ ہیں۔ ایلون مسک عرصے سے کہہ رہے ہیں کہ وہ ایکس کو ایسی ایپ بنانا چاہتے ہیں جہاں ہر قسم کی سروس صارف کو دستیاب ہو اور انہیں توقع ہے کہ آڈیو اور ویڈیو کالز کے فیچر سے مزید افراد کو اس سوشل میڈیا پلیٹ فارم پر لانے میں مدد ملے گی۔

ایک بار سندھ ہمارے حوالے کردو پی پی کی ضمانت ضبط کروادیں گے۔مصطفیٰ کمال