وفاقی دارالحکومت کی پولیس نے نیو ائیر سیکیورٹی پلان جاری کردیا ہے۔ آئی جی اسلام آباد محمد احسن یونس کا کہنا ہے کہ نیو ائیر نائٹ پر 1000 سے زائد پولیس افسران و جوان سیکیورٹی کے فرائض سرانجام دیں گے۔ انہوں نے بتایا ہے کہ اسلام آباد پولیس نے سال نو کے موقع پر سخت اقدامات اٹھانے کا فیصلہ کیا ہے۔ محمد احسن یونس نے کہا ہے کہ اسلام آباد کی مختلف شاہراہوں پر پولیس کے خصوصی سکواڈز تعینات کیے جائیں گے اور اسلام آباد کی اہم مارکیٹوں، پبلک مقامات پر بھی سپیشل پولیس ٹیمیں تعینات ہوں گی۔ انکا کہنا ہے کہ کسی بھی ایمرجنسی صورتحال سے نمٹنے کیلئے کوئیک رسپانس فورس الرٹ رہے گی جبکہ اسلام آباد کی اہم شاہراﺅں پر پٹرولنگ کے دستے بھی تعینات ہوں گے۔ احسن یونس نے کہا کہ گاڑیوں اور موٹر سائیکلوں پر جان لیوا کرتب دیکھانے کی کوشش کرنے والوں کے خلاف گرینڈ آپریشن کیا جائے گا اور ہوائی فائرنگ، ہلڑ بازی، ون ویلنگ، کارسکیٹنگ کے خلاف سخت ایکشن لیا جائے گا۔ آئی جی اسلام آباد کا کہنا ہے کہ کسی بھی فرد کو قانون ہاتھ میں لینے کی ہرگز اجازت نہیں دی جائے گی، امن و امان کو برقرار رکھنے میں پولیس ساتھ دے کرمہذب شہری ہونے کا ثبوت دیں۔ انہوں نے کہا کہ ہلڑ بازی، پبلک مقامات پر خواتین اور فیمیلیز کے ساتھ ناشائستہ رویہ برداشت نہیں کیا جائے گا، خوشیاں منانے کے دوران ناشائستہ رویہ اور قانون شکنی سے گریز کریں۔ آئی جی اسلام آباد احسن یونس نے مزید کہا کہ اسلام آباد پولیس اپنے شہریوں کی حفاظت اور سہولت کے لئے ہر موقع پر ان کے ساتھ کھڑی ہے۔

خلیجی بادشاہوں کے ساتھ تعلقات کو بہتر بنانے کی امریکی صدر کی خواہش میں نئی تیزی