راولپنڈی کے سات علاقوں میں سمارٹ لاک ڈاؤن لگانے کا فیصلہ

راولپنڈی (اپنے سٹاف رپورٹر سے) کرونا وائرس کی چوتھی لہر کے تیزی سے پھیلنے اور مثبت کیسوں کی شرح میں اضافہ کے باعث پنجاب کے پرائمری اینڈ سیکنڈری ہیلتھ ڈیپارٹمنٹ نے راولپنڈی کے سات علاقوں میں سمارٹ لاک ڈاؤن لگانے کا فیصلہ کیا ہے ,مثبت کیسوں کی شرح12فیصد تک پہنچنے پر راولپنڈی کے جن سات علاقوں میں سمارٹ لاک ڈاؤن بروز ہفتہ سے نافذالعمل ہو کر6اگست تک جاری رہے گا. اس ضمن میں پرائمری اینڈ سیکنڈری ہیلتھ ڈیپارٹمنٹ نے باقاعدہ نوٹیفکیشن جاری کر دیاہے .نوٹیفکیشن نمبر SO(G)/P&SHD/4-7/2020میں کہا گیا ہے گزشتہ2ہفتے سے پنجاب میں کورونا کی شرح میں تیزی سے اضافہ ہو رہا ہے جو صحت عامہ کے لئے انتہائی خطرناک ہو سکتا ہے جس کے لئے فوری حفاظتی اقدامات کی سخت ضرورت ہے. اس حوالے سے وزیر اعلیٰ پنجاب کی منظوری کے بعد ضلع راولپنڈی میں 6 اگست تک کنٹرولڈآمدورفت کا فیصلہ کیا گیا ہے جس کے تحت عمر بلاک فیز8،گلی نمبر16ڈھوک کھبہ نزد کمیٹی چوک،گلی نمبر19آریہ محلہ،گلی نمبر16نیو گلزار قائد،گلی نمبر1بینکر کالونی نزد عسکری 14،گلی نمبر5کے آر ایل اورگلی نمبر3نیو لالہ زار2واہ کینٹ کے علاقوں میں بڑے شاپنگ مالز،مارکیٹیں،تجارتی مراکز،سرکاری و نجی دفاتر اور ریستوران بند رہیں گےتمام مذہبی،ثقافتی اور نجی اجتماعات پر پابندی ہو گی،ہر قسم کی پبلک ٹرانسپورٹ بند رکھی جائے گی البتہ نجی گاڑیوں پر محدود آمدورفت کی اجازت ہو گی ,ڈیپارٹمنٹل سٹور, ادویات اور گروسری کے علاوہ تمام سیکشن بند رکھیں گےجہاں گاہکوں کو محدود تعداد میں داخلے کی اجازت ہو گی،سماجی فاصلہ برقرار رکھا جائے گا،ضلعی انتظامیہ کی جانب سے وضع کردہ ایس او پیز اور پالیسی پر سختی سے عملدرآمد کیا جائے گا .نوٹیفکیشن کے مطابق فارمیسیاں، میڈیکل سٹور،ویکسینیشن سینٹر،ہسپتال اور کلینک،پٹرول پمپ، کریانہ وگروسری سٹور،گوشت و مرغی کی دکانیں،دودھ، دہی پھل،سبزی کی دکانیں، کوریئر سروس اور یوٹیلیٹی سروسز 24گھنٹے کھلے رہیں گے.