آرمی چیف جنرل عاصم منیر سے برطانوی چیف آف جنرل اسٹاف نے ملاقات کی
آرمی چیف جنرل عاصم منیر سے برطانوی چیف آف جنرل اسٹاف نے ملاقات کی ہے۔پاک فوج کے شعبہ تعلقات عامہ (آئی ایس پی آر) کے مطابق جنرل سید عاصم منیر سے جنرل پیٹرک نکولس نے وفد کے ہمراہ جنرل ہیڈ کوارٹرز (جی ایچ کیو) میں ملاقات کی۔ برطانوی فوج کے سی جی ایس نے جی ایچ کیو آمد پر یادگار شہدا پر پھول چڑھائے جب کہ پاکستان آرمی کے چاق و چوبند دستے نے انہیں گارڈ آف آنر پیش کیا۔ آرمی چیف اور جنرل پیٹرک کے درمیان ملاقات میں علاقائی سکیورٹی اور باہمی دلچسپی کے معاملات پر تبادلہ خیال کیا گیا اور برطانوی سی جی ایس نے دہشت گردی کے خلاف جنگ میں پاک فوج کی قربانیوں کو بھی سراہا۔آئی ایس پی آر کا کہنا ہے کہ آرمی چیف سے ملاقات سے قبل جنرل پیٹرک نکولس نے چیئرمین جوائنٹس چیفس آف اسٹاف کمیٹی جنرل ساحر شمشاد سے جی ایچ کیو میں ملاقات کی۔
