بحیرہ عرب میں بننے والے سمندری طوفان کی شدت میں مزید کمی ہوگئی نیلوفر نے راستہ بدل لیا،کراچی اور گوادر محفوظ ہیں
محکمہ موسمیات کے مطابق، سمندری طوفان نیلوفرآج شام یارات ہوا کے کم دباؤ میں تبدیل ہونے کی توقع ہے۔ ہوا کے کم دباؤ کے باعث آئندہ 24 سے 36 گھنٹوں میں زیریں سندھ اور بلوچستان کے ساحلی علاقوں میں بھی بارش کا امکان ہے ۔اس وقت طوفان نیلوفر کراچی سے جنوب مغرب میں 490 کلومیٹرفاصلے پرہے اور اس کارخ بھارتی ریاست گجرات کی طرف ہے ۔سندھ،بلوچستان کے ماہی گیراتوارسے معمول کی سرگرمیاں شروع کرسکتے ہیں۔ لسبیلہ کی ساحلی پٹی پربھی کہیں کہیں بارش کا امکان ہے،۔ اسی دوران حکومتِ سندھ نے دعویٰ کیا ہے کہ وہ طوفان سے پیدا ہونے والے تمام خطرات سے نمٹنے کے لیے تیار ہے۔ حکومت سندھ کے مطابق ٹھٹھہ میں ایک سو پینتیس گوٹھوں کے لیے خیمہ بستی، نو ریلیف اور سات میڈیکل کیمپ قائم کردیے گئے ہیں۔ بدین میں سرکاری عمارتوں اسکولوں کو ریلیف کیمپوں میں تبدیل کردیاگیا ہے۔ عمرکوٹ میں بھی تیز بارش کی پیشگوئی کے بعد ضلع بھر میں ایمرجنسی نافذہے۔