خاتون محتسب پنجاب کی جانب سے جی سی یونیورسٹی فیصل آباد کو توہین عدالت کا نوٹس جاری کر دیا گیا

خاتون محتسب پنجاب کی جانب سے جی سی یونیورسٹی فیصل آباد کو توہین عدالت کا نوٹس جاری کر دیا گیا۔ نوٹس میں یونیورسٹی وائس چانسلر کو پانچ نومبر کو خاتون محتسب کے سامنے پیش ہونے کی ہدایت کی گئی ہے۔ جی سی یونیورسٹی فیصل آباد کو نوٹس، خاتون محتسب کو یونیورسٹی گیٹ سے اندر داخل نہ ہونے پر جاری کیا گیا۔ خاتون محتسب کو جی سی یونیورسٹی اولڈ کیمپس کے اچانک دورہ کے موقع پر وائس چانسلرکے حکم پر سیکیورٹی سٹاف نے یونیورسٹی گیٹ سے اندر داخل نہیں ہونے دیا۔ خاتون محتسب پنجاب نبیلہ حاکم خان کا کہنا ہے کہ ہراسانگی قانون 2010 کے تحت کام کی جگہ پر خواتین کو تحفظ فراہم کرنے کے لیے خاتون محتسب کسی بھی ادارے میں بغیر اطلاع ہراسمنٹ ایکٹ پر عملدرآمد کا جائزہ لینے کے لیے جا سکتی ہیں۔ بحیثیت خاتون محتسب میری ذمہ داری ہے کہ اداروں میں کوڈ آف کنڈکٹ اور ہراسمنٹ کمیٹی پر عمل درآمد کو چیک کروں۔ انہوں نے کہا کہ تعلیمی اداروں میں بچیوں کو محفوظ ماحول فراہم کرنا ہی اولین ترجیح ہے۔ کوئی بھی ادارہ تعاون سے انکار کرے گا تو توہین عدالت کا سامنا کرنا پڑے گا۔ توہین عدالت کے نوٹس پر عمل درآمد نہ ہونے کی صورت میں ادارے کے خلاف قانون کے مطابق سخت کاروائی کی جائے گی۔