ڈچ کمپنی نے دنیا کی پہلی 9 وولٹ بیٹری کے ذائقے والی ٹورٹیلا چپس متعارف کرا دی

علی رضا: ایک نئی ڈچ اسنیک کمپنی نے دنیا کی پہلی 9 وولٹ بیٹری کے ذائقے والی ٹورٹیلا چپس لانچ کر کے لوگوں کی توجہ حاصل کرنے کی انوکھی کوشش کی ہے — ایک ایسا ذائقہ جو 90 کی دہائی کے بچوں کو خوب یاد ہوگا۔ اگر آپ 1990 کی دہائی میں بڑے ہوئے ہیں تو آپ کو شاید وہ دھاتی ذائقہ اور ہلکی سی کرنٹ جیسی سنسناہٹ یاد ہوگی جو بیٹری کے دھاتی سرے کو زبان سے چھونے پر محسوس ہوتی تھی۔ اُس وقت یہ بچوں میں ایک مقبول مگر بےوقوفانہ مشغلہ تھا، اور اب ڈچ اسنیک برانڈ "ریوائنڈ" اسی یاد کو بنیاد بنا کر اپنی نئی چپس متعارف کرا رہا ہے۔ یہ بچپن کا تجربہ کھانے کی ایسی چیز میں ڈھالنا جو واقعی لذیذ ہو، یقیناً ایک بڑا چیلنج رہا ہوگا، لیکن Rewind نے وضاحت کی ہے کہ ان چپس میں بیٹری کے کوئی اصل اجزاء استعمال نہیں کیے گئے بلکہ تمام اجزاء مکمل طور پر محفوظ اور کھانے کے قابل ہیں۔ ریوائنڈ(Rewind) کے شیف اور فلیور اسپیشلسٹ میتیاس لارسن نے بتایا "یہ یقیناً ایک غیر معمولی فرمائش تھی۔ ہم نے لیموں کے تیزاب اور سوڈیم بائی کاربونیٹ کو ملا کر وہ زبان کو چبھنے والا احساس پیدا کیا، اور اس میں معدنی نمک شامل کر کے دھاتی ذائقے کا توازن قائم رکھا۔ نتیجہ حیرت انگیز طور پر مزیدار نکلا اور یہ ذائقہ واقعی تجسس پیدا کرتا ہے۔" برانڈ کے ڈیزائن اور کریٹیو سربراہ اینٹی لورونن نے کہا: "ریوائنڈ ایک ایسا برانڈ ہے جو ماضی کی یادوں سے متاثر ہے، تو ہم نے سوچا کہ آغاز اسی عجیب و غریب مگر مشترکہ یاد سے کیوں نہ ہو — ایک مزیدار خراجِ تحسین اُن لاپرواہ بچپن کی دوپہروں کو، جب ہم بیٹری چکھا کرتے تھے۔" ریوائنڈ کی یہ نئی ٹورٹیلا چپس فی الحال صرف نیدرلینڈز میں دستیاب ہیں، لیکن کمپنی جلد ہی انہیں یورپی مارکیٹ میں بھی متعارف کرانے کا ارادہ رکھتی ہے۔