جنوبی وزیرستان:نامعلوم افراد کی فائرنگ،جے یو آئی (ف) کے رہنما مولانا ثنا اللہ جاں بحق

صوبہ خیبر پختونخوا کے ضلع جنوبی وزیرستان لوئر کی تحصیل برمل کے علاقے اعظم ورسک میں نامعلوم افراد کی فائرنگ سے جمعیت علمائے اسلام ( ف)کے رہنما مولانا ثنا اللہ جاں بحق ہوگئے۔تفصیلات کے مطابق تحصیل برمل میں مولانا ثنا اللہ اعظم ورسک بازار کی جانب جا رہے تھے، راستے میں نا معلوم افراد نے ان پر فائرنگ کی، مسلح ملزمان فائرنگ کے بعد فرار ہوگئے۔ملزمان کی جانب سے فائر کی گئی گولیاں لگنے سے مولانا ثنا اللہ دم توڑ گئے، واقعہ کی اطلاع ملتے ہی قانون نافذ کرنے والے ادارے موقع پر پہنچ گئے اور لاش کو  اسپتال منتقل کر دیا۔پولیس نے علاقے میں سرچ آپریشن شروع کرکے ملزمان کی تلاش شروع کردی، علاقے میں خوف و ہراس کی فضا ہے، جے یو آئی (ف)کے کارکن بھی اپنے رہنما کے قتل کی اطلاع ملنے پراسپتا ل پہنچے ہیں۔حکام کا کہنا ہے کہ فائرنگ کرکے فرار ہونے والے ملزمان کی تلاش جاری ہے۔یاد رہے کہ مئی 2025 میں ضلع جنوبی وزیرستان کے ایک مدرسے کے قریب جمعیت علمائے اسلام (ف)کے رہنما مولانا نوراللہ کی گاڑی کو بم دھماکے کا نشانہ بنایا گیا تھا، خوش قسمتی سے جے یو آئی (ف)کے رہنما حملے میں محفوظ رہے تھے۔پولیس کے مطابق لوئر جنوبی وزیرستان کے اعظم ورسک بازار میں پولیس اسٹیشن کے قریب واقع شہزاد مدرسہ کے نزدیک مولانا نور اللہ کی گاڑی کے قریب بم دھماکا ہوا تھا، جس میں مولانا نوراللہ کو نشانہ بنایا گیا تھا۔