ہاشم آملہ کی انٹرنیشنل کرکٹ میں سنچریوں کی نصف سنچری مکمل

جنوبی افریقن کرکٹ ٹیم کے مایہ ناز اوپننگ بلے باز ہاشم آملہ نے انٹرنیشنل کرکٹ میں سنچریوں کی نصف سنچری مکمل کر لی، وہ یہ اعزاز پانے والے جنوبی افریقہ کے دوسرے دنیا کے ساتویں بلے باز بن گئے، آملہ نے سری لنکا کے خلاف آخری ون ڈے میں شاندار سنچری بنا کر یہ کارنامہ انجام دیا، آملہ نے ٹیسٹ میں 26 اور ون ڈے میں 24 سنچریاں بنا رکھی ہیں، اس سے قبل سچن ٹنڈولکر، رکی پونٹنگ، کمار سنگاکارا، جیک کیلس، مہیلاجے وردھنے اور برائن لارا بھی یہ سنگ میل عبور کر چکے ہیں، ٹنڈولکر کو انٹرنیشنل کرکٹ کی تاریخ میں ریکارڈ 100 سنچریاں بنانے کا عالمی اعزاز حاصل ہے، انہوں نے ٹیسٹ میں 51 اور ون ڈے میں 49 سنچریاں بنائی تھیں، پونٹنگ 71 سنچریوں کے ساتھ دوسرے، سنگاکارا 63سنچریوں کے ساتھ تیسرے، کیلس 62 سنچریوں کے ساتھ چوتھے، جے وردھنے 54 سنچریوں کے ساتھ پانچویں اور برائن لارا 53 سنچریوں کے ساتھ چھٹے نمبر پر موجود ہیں۔