سندھ کی عورتوں کو شہیدبے نظیر پر فخر ہے ،شہلا رضا

صوبائی وزیر برائے حقوق نسواں شہلا رضا نے کہا ہے کہ خواتین کی سماجی و معاشی ترقی کے جو خواب شہید بے نظیر نے دیکھے تھے وہ آج شرمندہ تعبیر ہو رہے ہیں۔ بے نظیر سندھ کی عورت تھیں سندھ کی عورتوں کو شہیدبے نظیر بھٹو پر فخر ہے ۔ ان خیالات کا اظہار انہوں نے سندھ رورل سپورٹ آرگنائزیشن ( سرسو) بدین کے تحت گولارچی کے قریب گوٹھ ابراہیم چانڈیو میں غربت گھٹاؤ سستے گھر اسکیم اور چھوٹے موٹے کاروبار کے لیے خواتین کو بلاسود قرضوں کے چیکوں کی تقسیم کے سلسلے میں منعقدہ تقریب سے خطاب کے دوران کیا۔ تقریب سے رکن سندھ اسمبلی تنزیلا قمبرانی، ڈپٹی کمشنر بدین حفیظ احمد سیال،ڈاکٹر ریاض عباسی اور دیگر نے بھی خطاب کیا۔ اس موقع پر خواتین کی بڑی تعداد موجود تھی ۔صوبائی وزیر شہلا رضا نے مزید کہا کہ مختلف پروگراموں کے تحت 13لاکھ خواتین کو معاشی طور پر مضبوط کیا جاچکا ہے ۔ ان میں سے اکثر خواتین وہ ہیں جوکم پڑھی لکھی ہیں اور کبھی گھروں سے باہر نہیں نکلیں لیکن ہم نے اُنھیں اپنی صلاحیتیں منوانے کا موقع دیا۔