لاپتہ بھارتی سائنسدان کی دریا سے لاش برآمد

کئی روز سے لاپتہ معروف بھارتی زرعی سائنسدان اور انڈین کونسل آف ایگریکلچرل ریسرچ (ICAR) کے سابق ڈائریکٹر جنرل ڈاکٹر سبنا ایّپن (Subbanna Ayyappan) کی لاش پراسرار حالات میں دریائے کاویری سے برآمد ہوئی۔ بھارتی میڈیا رپورٹس کے مطابق پولیس نے کہا کہ 10 مئی کو سری رنگا پٹنا کے قریب سائی آشرم کے نزدیک دریا میں ایک لاش دیکھی گئی جس کے بعد حکام کو اطلاع دی گئی۔ ڈاکٹر ایّپن، جو اپنی اہلیہ کے ساتھ میسور میں مقیم تھے، 7 مئی سے لاپتہ تھے۔ اتوار کی شام پولیس نے تصدیق کی کہ دریا سے برآمد ہونے والی لاش ڈاکٹر ایّپن کی ہے۔ پولیس کا یہ بھی کہنا تھا کہ ان کا اسکوٹر دریا کے کنارے لاوارث حالت میں پایا گیا۔ پولیس نے ابتدائی طور پر موت کی وجوہات جاننے کے لیے تحقیقات شروع کر دی ہیں اور ایک مقدمہ بھی درج کر لیا گیا ہے۔ رپورٹ کے مطابق سری رنگا پٹنا پولیس کا کہنا ہے کہ وہ ہر زاویے سے معاملے کی چھان بین کر رہی ہے تاکہ اس واقعے کے پیچھے کے حقائق کو بے نقاب کیا جا سکے۔ بھارتی میڈیا کے مطاطبق ڈاکٹر سبنا ایّپن بھارت میں زرعی تحقیق کے میدان میں ایک بڑا نام تھے۔ ان کی خدمات کے اعتراف میں انہیں اعلیٰ سرکاری اعزاز سے بھی نوازا گیا تھا۔ ان کی موت نے سائنسی و تعلیمی حلقوں میں گہرے صدمے کی لہر دوڑا دی ہے۔