بلوچستان:پسند کی شادی کرنے والی خاتون اور مردکو  قتل کرنے والے 11 ملزمان گرفتار

 بلوچستان میں پسند کی شادی کرنیوالی خاتون اور مرد کو قتل کرنے کے واقعہ میں اب تک 11 ملزمان گرفتار کر لئے گئے ۔اس حوالے سے وزیراعلیٰ بلوچستان سرفراز بگٹی نے کہا کہ آپریشن جاری ہے، تمام ملوث افراد کو کیفر کردار تک پہنچایا جائے گا، ریاست مظلوم کے ساتھ ہے۔واضح رہے کہ گزشتہ روز بلوچستان میں خاتون اور مرد کے بہیمانہ قتل کی ویڈیو وائرل ہوئی تھی۔ ویڈیو میں مسلح افراد نامعلوم مقام پر ایک خاتون اور مرد پر اندھا دھند فائرنگ کرتے دکھائی دے رہے تھے۔ترجمان بلوچستان حکومت کے مطابق وزیراعلی بلوچستان میر سرفراز بگٹی نے سوشل میڈیا پر ایک خاتون اور مرد کے بہیمانہ قتل کی ویڈیو وائرل ہونے کا نوٹس لیا تھا۔شاہد رند نے کہا تھا کہ غیر مصدقہ اطلاعات کے مطابق یہ عیدالاضحی کے قریب کا واقعہ ہے، اب تک لاشیں برآمد نہیں ہوئیں، علاقے میں اس وقت سی ٹی ڈی اور پولیس موجود ہے۔