راولپنڈی بڑی تباہی سے بچ گیا ،خطرناک دہشتگرد گرفتار,بارودی مواد، ہینڈ گرنیڈ اور ڈیٹونیٹر برآمد

راولپنڈی بڑی تباہی سے بچ گیا ،خطرناک دہشتگرد گرفتار کر لیا گیا ۔ ترجمان سی ٹی ڈی کے مطابق کائونٹر ٹیررازم ڈیپارٹمنٹ (سی ٹی ڈی)اور حساس ادارے نے کامیاب خفیہ کارروائی کے دوران انتہائی خطرناک دہشت گرد گرفتار کر لیا۔ دہشت گرد کے قبضے سے بارودی مواد، ہینڈ گرنیڈ اور ڈیٹونیٹر برآمد کر لئے گئے۔ ترجمان سی ٹی ڈی کے مطابق گرفتار دہشت گرد حساس مقامات کی ریکی مکمل کر چکا تھا اور کسی بڑے حملے کی منصوبہ بندی کر رہا تھا،بتایا گیا کہ ملزم متعدد بار افغانستان جا کر دہشتگردی کی تربیت حاصل کر چکا ہے اور دہشتگردوں کے ایک اہم کمانڈر کے ساتھ رابطے میں تھا۔ دہشت گرد کو راولپنڈی کے ایک علاقے سے گرفتار کیا گیا جہاں وہ کارروائی کے لیے تیاری میں مصروف تھا۔ ترجمان کے مطابق دہشت گرد نے چند روز قبل حساس مقامات کی ویڈیو سوشل میڈیا پہ وائرل کی تھی۔ گرفتاری کے بعد فوری طور پر سی ٹی ڈی نے مقدمہ درج کر کے مزید تفتیش شروع کر دی جبکہ سکیورٹی ادارے اس کے نیٹ ورک اور سہولت کاروں کے بارے میں بھی تحقیقات کر رہے ہیں۔