محکمہ موسمیات کی آندھی اور گرج چمک کے ساتھ مزید بارشوں کی پیشگوئی

مون سون سیزن کی اختتامی بارشوں کا سلسلہ جاری رہے گا، محکمہ موسمیات نے جمعرات سے ہفتہ کے دوران آندھی اور گرج چمک کے ساتھ مزید بارشوں کی پیشگوئی کر دی۔ محکمہ موسمیات کے مطابق 28 سے 30 ستمبر کے دوران چترال، دیر، ابیٹ آباد، کشمیر اور گلگت بلتستان میں گرج چمک کے ساتھ بارش کا امکان ہے، بالائی خیبرپختونخوا اور گلگت بلتستان کے بلند پہاڑی علاقوں میں برفباری بھی متوقع ہے۔ 28 سے 29 ستمبر کے دوران اسلام آباد، راولپنڈی، چکوال، مردان اور پشاور سمیت بالائی پنجاب میں بارشیں متوقع ہیں، ژوب، بارکھان، ڈیرہ غازی خان، ملتان، بہاولپور اور بہاولنگر میں بھی گرج چمک کے ساتھ بارش کا امکان ہے۔