ایران کبھی بھی نیوکلیئرہتھیار حاصل نہیں کرپائےگا، ڈونلڈ ٹرمپ
امریکی صدر ڈونلڈ ٹرمپ نے دعویٰ کیا ہے کہ ایران کبھی بھی نیوکلیئر ہتھیار حاصل نہیں کر پائے گا۔ ایران کی القدس فورس کے سربراہ جنرل قاسم سلیمانی کو حملے میں قتل کرنے کے بعد سے امریکی صدر کی بڑھکوں اور دھمکیوں کا سلسلہ برقرار ہے، طاقت کے نشے میں چور ڈونلڈ ٹرمپ ایران کو کھلم کھلا للکار رہے ہیں اور ساتھ ہی خطرناک انجام کی دھمکیوں کے ذریعے جلتی پر تیل چھڑک رہے ہیں۔ دھمکی آمیز پیغامات کے بعد ڈونلڈ ٹرمپ نے سماجی رابطے کی ویب سائٹ پر نیا بیان جاری کیا ہے جس میں انہوں نے دعویٰ کیا ہے کہ ایران کبھی بھی نیوکلیئر ہتھیار حاصل نہیں کر سکے گا۔ غیر ملکی نیوز ایجنسی کے مطابق ایران یورینیم افزودگی کے لیے حدود اور اب ذخیرے کی مقدار کی پاس داری نہیں کرے گا، اور اپنی تکنیکی ضروریات کے مطابق یورینیم کی افزودگی جاری رکھے گا۔ تہران نے واضح کیا ہے کہ امریکا نے جنگ میں پہل کی ہے اب اسے جواب کے لیے تیار رہنا ہوگا، ڈونلڈ ٹرمپ کو عالمی قوانین کا علم ہے نہ اقوام متحدہ کی قراردادوں کی سمجھ، امریکیوں کو برابر کی چوٹ لگنے سے ہی جنگ کا دور ختم ہوگا۔ قبل ازیں امریکی صدر نے ایک ٹوئٹ میں کانگریس پر ایک بار پھر واضح کیا ہے کہ صدر اور کانگریس کو اپنا وقت اور توانائیاں مواخذے کی قانونی پیچیدگیوں پر ضائع نہیں کرنی چاہیئں جب کہ ہمارے پر پاس بڑے اہم معاملات زیر التوا ہوں۔
IRAN WILL NEVER HAVE A NUCLEAR WEAPON!
— Donald J. Trump (@realDonaldTrump) January 6, 2020