پاکستان کے ٹی وی پر راج کرنے والی سینیئر اداکارہ بشریٰ انصاری اور ثمینہ پیرزادہ سمیت فیصل قریشی طویل عرصے بعد جلد ہی بڑے پردے پر واپسی کرنے والے ہیں، ان کی آنے والی فلم دیمک کاحال ہی میں  ٹیزر جاری کردیا گیا۔رافع راشدی کی ہدایت کردہ فلم ’دیمک‘ کی کہانی عائشہ مظفر نے لکھی ہے اور ان کی بطور لکھاری یہ پہلی فلم ہوگی۔فلم کی میگا کاسٹ میں جاوید شیخ، ثمینہ پیرزادہ، بشریٰ انصاری، سونیا حسین، فیصل قریشی اور ثمن انصاری سمیت دیگر اداکار شامل ہیں۔جاری کیے گئے مختصر دورانیے کے ٹیزر میں اگرچہ فلم کے مرکزی کرداروں کو دکھایا گیا ہے، تاہم اس سے کہانی کو سمجھنا مشکل ہے۔ٹیزر میں ثمینہ پیرزادہ، بشریٰ انصاری، جاوید شیخ اور سونیا حسین سمیت دیگر کے کرداروں کو دکھایا گیا ہے۔ڈارک ہارر فلم کی ٹیزر جاری کرتے ہوئے اسے ریلیز کرنے کی تاریخ کا اعلان نہیں کیا گیا، تاہم عندیہ دیا گیا کہ اسے جلد سینمائوں میں پیش کردیا جائے گا۔فلم کی کہانی سے متعلق ابھی کچھ بھی کہنا قبل از وقت ہے، تاہم نام اور جاری کیے گئے ٹیزر سے عندیہ ملتا ہے کہ شائقین کو ڈارک ہارر سمیت ایکشن بھی دیکھنے کو ملے گا۔’دیمک‘ کے ذریعے ثمینہ پیرزادہ اور بشریٰ انصاری جیسی اداکارائیں طویل عرصے بعد بڑے پردے پر واپسی کر رہی ہیں جب کہ فیصل قریشی بھی کئی سال بعد فلم میں دکھائی دیں گے۔امکان ظاہر کیا جا رہا ہے کہ فلم کو آئندہ برس کی پہلی سہ ماہی میں ریلیز کیا جائے گا، تاہم ممکنہ طور پر اسے عید الفطر پر بھی ریلیز کیا جا سکتا ہے۔