وزیراعلی مریم نواز شریف کی ہدایت پر پنجاب بھر میں یوم تشکر ومعرکہ حق وباطل کی پروقار تقریبات شروع ہوگئی ہیں، وزیراعلی پنجاب مریم نواز شریف نے وزرا کے ہمراہ پرچم کشائی کرکے تقریبات کا باقاعدہ آغاز کیا ، وزراء ، مشیران معاونین خصوصی ،اعلی صوبائی سرکاری افسر ان نے تقریب میں شرکت کی۔ تفصیلات کے مطابق اس موقع پر پنجاب پولیس کے چاق وچوبند دستے نے پرچم سلامی پیش کیا، تقریب میں قومی ترانہ پیش کیا گیا،شہداکو خراج تحسین،دعا بھی کی گئی۔ وزیراعلی پنجاب مریم نواز شریف کی قیادت میں یوم تشکر ومعرکہ حق کی تقریبات میں عوام کی بھرپور شرکت تھی، نماز فجرمیں خصوصی طور پر ملک وقوم کی سلامتی اور امن کے لئے دعائیں اور صوبہ بھر میں معرکہ حق ویوم تشکر کی تقریبات میں قرآن خوانی کی گئی ۔ آپریشن بنیان مرصوص کےشہداء کرام کے لئے دعائے مغفرت اور درجات کی بلندی کی دعائیں کی گئیں جبکہ بھارتی جارحیت کی وجہ سے زخمی ہونیوالے شہریوں ، افسروں اور جوانوں کی صحت یابی کی خصوصی دعائیں بھی کی گئیں،اس موقع پر استحکام پاکستان اور ملک وقوم کی ترقی کے لئے مساجد میں خصوصی دعا کا اہتمام کیا گیا جبکہ صوبہ بھر شہدائے کے مزاروں پر پھول چڑھائے گئے ، سرکاری اور نجی عمارتوں پر سبز ہلالی پرچم لہرائے گئے۔ صوبہ بھر میں سکولوں،کالجو ں او ر یونیورسٹیوں میں معرکہ حق ویوم تشکر کی خصوصی تقریبات کے اہتمام کے ساتھ افواج پاکستان کو خراج تحسین پیش کرنے کے لئے خصوصی ریلیاں نکالی جارہی ہیں۔ اس موقع پر مریم نواز کا کہناتھا کہ قوم کوفتح مبارک ہو ، پاک فضائیہ کے دلیر اور جانباز شاہینوں نے متکبر دشمن کا غرور خاک میں ملا دیا، افواج پاکستان کی شاندار کامیابی اور فتح پر اللہ تعالیٰ کا شکر بجا لاتے ہیں، ”آپریشن بنیان مرصوص“ نڈر لیڈرشپ،دلیر افواج پاکستان اور متحد قوم کے غیر متزلزل اتحاد کا مرہون منت ہے، امن کے داعی ہیں مگر جارحیت کا منہ توڑ جواب دیں گے۔