وزیراعظم شہباز شریف نے ملک بھر میں بارشوں اور سیلاب سے متاثرہ علاقوں میں ریسکیو آپریشنز کو مزید بڑھانے اور تیز کرنے کی ہدایت کی ہے۔ وزیراعظم نے لینڈ سلائیڈنگ کے باعث بند شاہراہوں خصوصاً شاہراہ قراقرم اور ناران-بابوسر-چلاس شاہراہ پر بحالی کا کام تیز تر کرنے کی ہدایت کی۔ وزیر اعظم نے چیف سیکریٹری گلگت بلتستان کو ہدایت کی کہ جو مسافر شاہراہیں بند ہونے کی وجہ سے پھنسے ہوئے ہیں انہیں رہائش ، خوراک سمیت ہر ممکن سہولیات فراہم کی جائیں۔ وزیر اعظم شہباز شریف کا کہنا ہے کہ سیلاب سے متاثرہ علاقوں میں وبائی امراض کے روک تھام کے لئے اقدامات انتہائی ضروری ہیں ، مون سون کے آنے والے اسپیلز کے لئے این ڈی ایم اے، پی ڈی ایم ایز، گلگت بلتستان اور آزاد جموں و کشمیر کے ڈیزاسٹر مینجمنٹ کے ادارے مل کے لائحہ عمل بنائیں، شہری سیلاب سے بچاؤ کے لئے میونسپل ادارے نکاسیء آب اور سیوریج کے بہترین اقدامات کریں ۔ انہوں نے ملک میں بارشوں اور سیلاب سے ہونے والے جانی و مالی نقصانات پر اظہار افسوس کیا۔ وزیراعظم نے حادثات اور سیلاب میں جاں بحق ہونے والوں کی بلندیء درجات کی دعاء کی۔