وفاقی دارالحکومت کے بعد خیبرپختونخوا کے ضلع بٹگرام میں ضلعی انتظامیہ کی کارروائی کے دوران گدھے کا گوشت برآمد کرلیا گیا۔ ڈپٹی کمشنر بٹگرام کے آفیشل فیس بک پیج سے جاری بیان میں کہا گیا ہے کہ ایک شہری کی خفیہ اطلاع پر ایڈیشنل اسسٹنٹ کمشنر بٹگرام اختر رسول نے کارروائی کرتے ہوئے کوزہ بانڈہ کے مقام پر چھاپہ مارا، کارروائی کے دوران تازہ ذبح کیا ہوا گدھا برآمد ہوا۔ ڈپٹی کمشنر نے کہا کہ کارروائی کے دوران دو افراد کو گرفتار کر کے پولیس کے حوالے کیا گیا جبکہ گوشت کو فوری طور پر تلف کر دیا گیا۔ اس حوالے سے ضلعی انتظامیہ کا کہنا ہے کہ ملزمان کے خلا ف مقدمہ درج کر کے تفتیش شروع کر دی گئی ہے تاکہ ملوث نیٹ ورک کو بے نقاب کیا جا سکے۔ اس موقع پر ایڈیشنل اسسٹنٹ کمشنر نے کہا کہ عوام کی صحت سے کھیلنے والے کسی رعایت کے مستحق نہیں، اور ان کے خلاف سخت قانونی کارروائی عمل میں لائی جائے گی۔ ضلعی انتظامیہ نے مزید کہا کہ ضلع بھر میں محفوظ اور معیاری خوراک کی فراہمی کے لیے کارروائیاں مسلسل جاری رہیں گی۔ عوام سے اپیل کی گئی ہے کہ اگر وہ کسی بھی غیر قانونی سرگرمی، خاص طور پر جعلی یا مضر صحت اشیائے خورونوش کی تیاری یا فروخت کی اطلاع رکھتے ہوں، تو فوراً انتظامیہ یا پولیس کو مطلع کریں تاکہ بروقت کارروائی ممکن ہو سکے