کراچی میں جشن آزاد ی اورمعرکہ حق کے سلسلے میں خصوصی آزادی ٹرین کا افتتاح کر دیا گیا۔سینئر وزیر سندھ شرجیل انعام میمن نے فیتہ کاٹ کر خصوصی آزادی ٹرین کا افتتاح کیا ، صوبائی وزیر شرجیل میمن نے کینٹ اسٹیشن پر جشن آزادی کا کیک بھی کاٹا۔اس موقع پرمیڈیا سے گفتگو کرتے ہوئے شرجیل میمن نے کہا کہ کلچر ڈیپارٹمنٹ کی جانب سے ڈیزرٹ ٹرین پہلے سے چل رہی ہے ، خصوصی آزادی ٹرین مفت چلائی جا رہی ہے، جشن آزادی کے ساتھ معرکہ حق کی کامیابی کو جوش و خروش سے منایا جا رہا ہے، ہماری فورسز نے معرکہ حق میں بھارت کو دھول چٹائی، بھارت کو اپنی ٹیکنالوجی پر بہت غرور تھا ،جس طرح ہماری فورسز نے بھارت کو دھول چٹائی اس کی مثال نہیں ملتی، ہماری فوج نے بھارت کو عبرتناک شکست دی۔ بلاول بھٹو نے نریندر مودی جیسے دہشت گرد کو دنیا بھر میں ایکسپوز کیا۔شرجیل میمن نے کہا کہ بلاول بھٹو نے دنیا کو مودی کا اصل چہرہ دکھایا، پوری بھارتی عوام مودی پر تنقید کر رہی ہے۔انہوں نے کہا کہ اختلافات ختم کر کے ہمیں ایک قوم بن کر چیلنجز کا سامنا کرنا چاہیے، وزیر اعلیٰ سندھ نے تمام سیاسی جماعتوں کو اجلاس میں بلایا،سندھ حکومت نے ہمیشہ غریب عوام کی بات کی ہے، سندھ حکومت ہر شعبے میں بہتری کی جانب گامزن ہے، عوام کو صرف سیاسی نعرے نہیں چاہئیں ۔صوبائی وزیر نے کہا  کہ پاکستان سب سے زیادہ دہشت گردی کا شکار رہا ہے، ہماری افواج نے جانوں کے نذرانے پیش کیے، ہم صرف امن چاہتے ہیں، پاکستان ایک متحد قوم ہے ہمیں یہ پیغام دنیا کو دینا ہے۔