امریکا میں صدارتی انتخابات میں بڑھتے ہوئے تنائو کے پیش نظر واشنگٹن ڈی سی میں سیکیورٹی سخت کردی گئی ہے۔ شہر کی گلیوں میں پولیس اہلکار اور پولیس موبائلز موجود ہیں جبکہ وائٹ ہاؤس کے ارد گرد 8 فٹ اونچی لوہے کی باڑ لگادی گئی ہے۔کیپیٹل کی عمارت کے گرد بھی باڑ اور رکاوٹیں کھڑی کی گئی ہیں، جس کے نتیجے میں کئی کاروباری افراد نے حفاظتی اقدامات کے تحت اپنے کاروبار بند کر دیے ہیں۔ اوریگن، پنسلوینیا، اور کیلیفورنیا میں بھی مزید سخت حفاظتی اقدامات کیے گئے ہیں۔پولنگ کے دوران امریکی ریاست جارجیا کی فلٹن کائونٹی کے 5 پولنگ اسٹیشنز پر بم کی افواہیں سامنے آئیں۔ دھمکیوں کے باعث دو مقامات سے ووٹرز کے انخلا پر ووٹنگ کے عمل میں تاخیر ہوئی۔ ان پولنگ اسٹیشنز پر عارضی بندش کے بعد، ووٹنگ کا عمل پھر سے بحال ہوگیا۔یہ تمام صورتحال اس بات کی عکاسی کرتی ہے کہ امریکہ میں صدارتی انتخابات کے دوران سیکیورٹی اور عوامی تحفظ کو خاص طور پر اہمیت دی جا رہی ہے، اور سیاسی تنائو کی شدت بڑھ رہی ہے۔